તું સર્વસત્તાધીશ છે ; તું સર્વાધાર નો સંતાન છે;
આ વિશ્વ છે તારું સદન, તુજ આત્મારૂપ મહાન છો !
આવી ઉભો સંગ્રામમાં, કર્તવ્ય નિજ વિસરી ગયો
શોકેડૂબી ને મોહવશ, નિજધર્મ ને ભૂલી ગયો !
તું દીનહીન મલિન વાણી, બોલતા શરમાય ના;
જે છે અચળ આદિ અનાદિ, દેહથી ભરમાય ના !
આ દેહ ના સાધન વડે, ઝટ સાધી લે તું ઉન્નતિ:
આળસમહી ચૂકીશ જો, કર્તવ્ય થાશે અવનતિ !
ક્ષણક્ષણ થઇ આયુષ્ય વીતે છે; વિચારી જો ફરી
તું ચાલ પથ પર માંડ ડગલાં, અભયને ધારણ કરી !
નિષ્કામ કર્મ કરે વીરો, ફળ ની અપેક્ષા ના ધરે;
સુખદુઃખ થી લેપાય ના, જે સર્વ બ્રહ્માપર્ણ કરે !
આ મેં કર્યું અભિમાનથી, મનમાં તું મણકા સેરવે,;
નિમિત્ત તું તો માત્ર, આ જગતયંત્ર બીજો ફેરવે !
સોંપે પ્રભુજી કર્મ જે તે, આપણે કરવા પડે;
ગમતા ન ગમતા હોયપણ, નિદાન આચરવા પડે !
તું દે ધ્રુજાવી ધરણને, ઓ વીર તારા ચરણ થી;
જે અભયપદ પામી ચુક્યો; તેઓ ડરે ના મરણ થી !
અન્યાય સહેવો ભીરુ થઇ; શોભે ન શ્રેષ્ઠ મનુષ્યને;
તું ઊંઠ દુર્બળતા ત્યજીને, ખેંચ બાણ ધનુષ્યને !
મિત્રો, ઉપર ની પ્રેરણાદાયક કવિતા મને એક જૂનું પુસ્તક વાંચતા વાંચતા મળી આવી હતી.
આ કવિતા કવિ ” મધુર “ દ્વારા રચવા માં આવી હતી. આ કવિતા ના એક એક શબ્દ ગજબ નું જોશ આપે છે. જેમ કૃષ્ણ ની આ પ્રેરણાદાયક કવિતા થી મહાન યોદ્ધા અર્જુન ને યુદ્ધ કરવા ની પ્રેરણા મળી તેમ કદાચ આ કવિતા વાંચવા થી જો કોઈને પણ થોડીક પણ પ્રેરણા મળી જશે તો આપણા આ મહાન કવિ ” મધુર ” ની મહેનત ફળી જશે.
હું વેદાંગ એ. ઠાકર આપ સૌ નું આ બ્લોગ પર હાર્દિક સ્વાગત કરી રહ્યો છું. મારા બ્લોગ ઉપર હું મારા મન ની વાચા ને તમારી સમક્ષ નિખાલસતા થી રજુ કરી રહ્યો છું. તેથી આશા છે કે આપ સૌ તેને પ્રેમ થી આવકારશો. 
વેદાંગ એ. ઠાકર ની અંતરંગ વાતો 